Vryfees Grootste nog!

DIE Vryfees is vanjaar die grootste wat Bloemfontein nog gesien het. Van 10 tot 15 Julie is ook nuwighede te ervaar wat nog nêrens te sien was nie. Dit is nie sommer vir niks nie dat dit die soveel meer-fees genoem word.

Van Australië kom ’n groot pretprojek waarin feesgangers sommer ook deel van die “akteurs” word. Vir Curious creatures – wat heeldag op die fees te sien sal wees, boonop gratis – word fantastiese wesens se skaduwees op ’n groot “muur”geprojekteer. Nader mense die muur word hul skaduwee ook deel van die aksie op die “muur” en reageer die wesens op gehoorlede se bewegings. Dié vrypret kom spesiaal vir die fees van Australië onder die beskerming van die Australiese kunsteraad.

Nog ’n nuwigheid is die Vryfees-kampustoneel. Dramadepartemente van agt universiteite is genooi om hul werk hiervoor in te skryf. Die eerste vier inskrywings is aanvaar en hulle kry van die fees geld om die stukke te ontwikkel. Die departemente staan pa vir die gehalte van die werk. Die projek gee nie net studentetalent die kans om op die fees op te tree nie, die kollig val ook spesiaal op die skrywende talente van jong dramaturge, want net stukke wat nog nooit opgevoer is nie, word aanvaar. Soos die geluk dit wou hê, word drie uiteenlopende genres verteenwoordig: drama, komedie en kabaret.

Die gehalte van die dramas was vanjaar so goed dat besluit is om veel meer as verlede jaar aan te bied. Van die bekendste toneelname is betrokke: San-dra Prinsloo, Amanda Strydom, Hannes van Wyk, Brümilda van Rensburg, Anthea Thompson, Nicola Hanekom, Deon Lotz, Illse Roos, Pieter-Dirk Uys en Bettie Kemp.

Uiteenlopende komedies (11 van hulle) spog met ’n ewe indrukwekkende lys van bekendes: Tobie Cronjé, Gerben Kamper, Lulu Botha, Chris van Niekerk, André Stolz, Lizz Meiring, Elsabé Daneel, Susanne Beyers, Joanie Combrink, Neels van Jaarsveld, Hannes Brummer en die ou bekendes Marion Holm en Margit Meyer-Rödenbeck (Dowwe Dolla).

Die mond water feitlik van al die aptytwekkende heerlikhede. Elna van der Merwe en Zorada Temmingh, die gewilde blondes, is terug met ’n span dansers om in die land van die tango te gaan kuier; Stef Bos het ’n program spesiaal vir sy “geliefde” Bloemfontein geskep, die fluitspeler Wouter Kellerman en sy groot span musikante bring wêreldmusiek soos min, Coenie de Villiers kom met Hart van Glas, Jak de Priester vier tien jaar in die bedryf, Laurika Rauch sing oor nuwe temas, Johrné van Huyssteen kyk terug oor sy lewe, Ses Snare is weer hier en Chris Chameleon, Lize Beekman, Elvis Blue, Romanz en Nianel, Navi Redd, Koos Kombuis, Jan Blohm en die Radio Kalahari-orkes kom gooi spesiale draaie.

Verskeidenheid is ook die wagwoord op die klassieke musiekverhoog – Franse musiek as klavierduo, die Israeli-pianis Ishay Shaer vertolk Beethoven en Chopin, die kitaarduo James Grace en Jonathan Crossley speel gewilde treffers, Ockie Vermeulen en sy span wys orrel kan ook net so lekker popmusiek maak, die sopraan Zanne Stapelberg kuier in vurige Suid-Amerika en Rocco de Villiers droom saam met ‘n strykensemble. Die boekeprogram is selfs omvattender as gewoonlik, maar daar is ook kans om jou gunsteling-verse te laat voordra of saam met bekende skrywers en akteurs te eet en gesels, en die slypskool is gemik op die skryf van artikels en rubrieke. Daar is die gebruiklike buitelandse kunsrolprente en ná die sukses van die Kaapse Wynlandrolprentfees se kortfilms verlede jaar is twee programme vir vanjaar saamgestel. Voeg nog hierby uitgebreide visuele kunste (meer as verlede jaar se uitstallings), die gratis musiekverhoë, die lokaas van stalletjies, talle eet- en kuierplekke en die Vryfees gaan vanjaar waarlik soveel meer bied.